जुन्नर पर्यटन विकासासाठी सर्वसमावेशक आराखडा तयार करणार - खा.डॉ.अमोल कोल्हे

जुन्नर पर्यटन विकास संस्थेकडुन विविध मागण्या ...

जुन्नर पर्यटन विकास संस्थेच्या वतीने पर्यटन विकासासाठी विविध मागण्यांचे निवेदन 

शिरुर लोकसभेचे खासदार डाॅ अमोल कोल्हे  यांना देण्यात आले. या प्रसंगी जुन्नर पर्यटन विकास संस्थेचे आजपर्यंतचे उपक्रम, तसेच भविष्यात, जुन्नर पर्यटन विकासाच्या विविध योजनांची माहिती आणि  "जुन्नर पर्यटन मॉडेल" चे सादरीकरण संस्थापक श्री मनोज हाडवळे यांनी केले. 

           तालुक्यातील विविध गावातील पर्यटन स्थळे निश्चित करुन तेथे पार्किंग लॉट, पिण्याच्या पाण्याची सोय ,शौचालय सुविधा, दिशादर्शक फलक,माहिती फलक,जुन्नर पर्यटन नकाशा लावण्यासाठी मागणी करण्यात आली. 

          तसेच आदिवासी विकास आणि पर्यटन विभागाचे वतीने  होम स्टे, लोक कला संवर्धन करण्यासाठी विविध महोत्सव, गाईड प्रशिक्षण, आदरातिथ्य,कलाकुसर प्रशिक्षण देण्यात यावे.यासाठी सहकार्य करावे अशी विनंती करण्यात आली. 

        शिवजयंती महोत्सव हा राज्यातील सर्व शिवप्रेमींना आकर्षित करण्यासाठी 7 दिवस आयोजित करुन त्यामध्ये हेरीटेज वाॅक ,लोककला  प्रदर्शन, कृषी प्रदर्शन, शालेय आणि खुला गट विविध स्पर्धा,  स्थानिक बचत गटाच्या उत्पादन प्रदर्शन, खाद्य संस्कृती सफर,  मॅरेथॉन रन, सायकल स्पर्धा  आयोजित  करुन या माध्यमातून मोठ्या प्रमाणावर पर्यटक आकर्षित करता येतील.   यासाठी प्रयत्न व्हावे अशी  मागणी यावेळी केली . 

जुन्नर पर्यटन विकासासाठी बहुउद्देशिय सभागृह,तालुका क्रिडा संकुल, पर्यटन निवास  याबद्दल  पाठपुरावा व्हावा अशी विनंती ही शिष्टमंडळाकडुन  करण्यात आली. 

              या वेळी बोलताना डाॅ. अमोल कोल्हे म्हणाले, "जुन्नर पर्यटन विकास संस्थेने केलेल्या सर्व मागण्या स्तुत्यच आहेत.

त्या पूर्ण करण्यासाठी  शिव-संस्कार-सृष्टी आराखडा बनवण्याचं काम चालु आहे, यामध्ये बहुतेक बाबी समाविष्ट करण्यात येतील.

जास्तीतजास्त पर्यटन विकासासाठी महामार्ग मजबूतीकरण, बाह्यवळण रस्ते, पुणे नाशिक रेल्वे, व ईतर प्रकल्प हाती घेतले आहेत. ते लवकरच पुर्ण होणार आहेत. 

जुन्नर तालुका हा पुणे, नाशिक, मुंबई आणि अहमदनगर  या चार मोठ्या शहरांपासुन सारख्या अंतरावर आहे.हा सुवर्ण चतुष्कोण गृहित धरून  

"पर्यावरण पुरक रहिवासी झोन" म्हणून विकसित करण्याचा विचार  व्यक्त केला.

 भिमाशंकर ते भंडारदरा हा ट्रेक रुट स्वतः करण्याचा मनोदय त्यांनी व्यक्त केला. त्यामुळे निसर्ग प्रेमी मोठ्या संख्येने सहभागी होऊन स्थानिक गरजू तरुणांना गाईड म्हणून सेवा देता येईल. आपली 10 वर्षांपासून सुरू झालेली जबाबदार जुन्नर पर्यटन चळवळ ,"जुन्नर पर्यटन मॉडेल" म्हणून  ओळखली जाऊ लागली आहे. 

जुन्नर तालुक्यातील जलाशयांमध्ये  विविध  क्रिडा प्रकार सुरु करुन पर्यटन विकासासाठी चालना देणार असल्याचे स्पष्ट केले.   तालुक्यातील साहसी पर्यटन विकासासाठी लवकरात लवकर पी.पी.पी.धोरण तयार  करण्यात येणार आहे.अशी  ग्वाही जुन्नर पर्यटन विकास संस्था शिष्टमंडळा समोर डाॅ अमोल कोल्हे यांनी दिली. 

या वेळी  जुन्नर पर्यटन विकास संस्यांच्या वतीने  जबाबदार पर्यटन जुन्नरचे सन्मानचिन्ह ,मढचे पेढे आणि शिवप्रतीमा देवुन खासदार डाॅ अमोल कोल्हे  साहेबांचा सत्कार करण्यात आला. त्यावेळी, जुन्नर पर्यटन विकास संस्थेचे अध्यक्ष- श्री यश मस्करे, उपाध्यक्ष- प्रा राधाकृष्ण गायकवाड, सचिव -श्री जितेंद्र बीडवई, खजिनदार-श्री शिरीष भोर आणि जेष्ठ मार्गदर्शक  दत्ता बाळसराफ, सर्पदंश तज्ञ डाॅ.  सदानंद राऊत, साहसी  क्रिडा  तज्ज्ञ  जितेंद्र देशमुख,पत्रकार अशोक खरात,  साहित्तिक संदीप वाघोले, अमोल कुटे, शिरीष डुंबरे व मनोज हाडवळे  उपस्थित होते.